ငြိမ်းချမ်းရေးဖြစ်စဉ်မှာ အမျိုးသမီးပါဝင်ရင် လက်နက်ကိုင်လမ်းစဉ်ပျောက်သွားနိုင်

ငြိမ်းချမ်းရေးဖြစ်စဉ်မှာ အမျိုးသမီးတွေ ပါဝင်ခြင်းအားဖြင့် နိုင်ငံရေးပြဿနာတွေကို နိုင်ငံရေးနည်းနဲ့ ဖြေရှင်းဖို့ဘက်ကို ပိုပြီးတော့တွန်းအားပေးပြီး လက်နက်ကိုင်လမ်းစဉ်တွေပျောက်သွားအောင်လုပ် ဆောင်နိုင်မယ်လို့ ယုံကြည်ကြောင်း မြန်မာ့အမျိုးသမီးသမဂ္ဂရဲ့ မူဝါဒရေးရာဦးဆောင်အဖွဲ့ဝင် ဒေါ်မိဆူးပွင့်က ပြောပါတယ်။

မကွေးမြို့မှာ ဒီနေ့ကျင်းပတဲ့ နိုင်ငံတကာ ငြိမ်းချမ်းရေးနေ့မှာ ဒေါ်မိဆူးပွင့်က ပြောကြားခဲ့တာဖြစ်ပြီး ပဋိပက္ခဖြစ်စဉ်တွေမှာ ခွဲခြားဆက်ဆံမှုတွေကပဲ အဓိကကျ တွန်းအားပေးနေတယ်လို့လည်း ပြောပါတယ်။

ကျားမရေးရာ ခွဲခြားဆက်ဆံတာ၊ ဘာသာအယူဝါဒ၊ လူမျိုးရေးစတဲ့ ခွဲခြားမှုတွေဟာ ငြိမ်းချမ်းရေးကို ခြိမ်းခြောက်နေတဲ့ အရာတွေပဲဖြစ်တယ်လို့ ဆိုပါတယ်။

ဒေါ်မိဆူးဟာ လက်နက်ကိုင်အဖွဲ့အစည်းတခုဖြစ်တဲ့ ABSDF မှာလည်း ထိပ်တန်းခေါင်းဆောင်တစ်ဦးဖြစ်ပါတယ်။

မြန်မာ့အမျိုးသမီးများသမဂ္ဂ ဥက္ကဋ္ဌ ဒေါ်တင်တင်ညိုကတော့ နှစ်ဘက်စစ်ပွဲတွေဟာ ဝေးလံခေါင်သီတဲ့ တိုင်းရင်းသားဒေသတွေမှာ ဖြစ်ပွားလေ့ရှိတဲ့အတွက် သတင်းအချက်လက်တွေရရှိဖို့ ခက်ခဲနေတယ်လို့ ပြောပါတယ်။

ဒါ့အပြင် စစ်ဖြစ်လာခဲ့ရင် အမျိုးသားရော၊ အမျိုးသမီးရော တွေ့ကြုံရင်ဆိုင်ရတယ်ဆိုပေမယ့် အမျိုးသမီးနဲ့ ကလေးသူငယ်တွေ အပေါ်မှာပိုပြီး ဆိုးကျိုးတွေကျရောက်စေတယ်လို့လည်း ဆိုပါတယ်။
စစ်ဖြစ်လာပြီဆိုရင် အမျိုးသမီးတွေအပေါ် လိင်အကြမ်းဖက်တာတွေအပါအဝင် တခြား မျှော်လင့်မထားနိုင်တဲ့ အန္တရာယ်တွေလည်း ကျရောက်နိုင်တယ်လို့ပြောပါတယ်။

ကလေးတွေရဲ့ ပညာရေးကျန်းမာရေးကအစ စားဝတ်နေမှုတွေပါ ကျပ်တည်းပြီး အားနည်းတဲ့ အမျိုးသမီးထုနဲ့ ကလေးသူငယ်အများစုမှာ မငြိမ်းချမ်းနိုင်တဲ့ ဘေးဒဏ်ကို ပိုခံစားရတယ်လို့ ဒေါ်တင်တင်ညိုက ပြောပါတယ်။

မကွေးတိုင်းဒေသကြီး လွှတ်တော် ဒုဥက္ကဋ္ဌ ဦးဇော်မျိုးဝင်းကတော့ ငြိမ်းချမ်းရေးနဲ့ ပတ်သက်ရင် နိုင်ငံပေါင်းစုံဟာ ညီညွတ်ဖို့လိုတယ်ဆိုတဲ့ ကမ္ဘာ့ကုလသမဂ္ဂရဲ့ ဆောင်ပုဒ်နဲ့အညီ ကျင့်သုံးနိုင်ဖို့ လိုတယ်လို့ ပြောပါတယ်။

နိုင်ငံတကာငြိမ်းချမ်းရေးနေ့ကို နှစ်စဉ်နှစ်တိုင်း ဆောင်ပုဒ်တစ်ခုခုကိုရွေးချယ်ပြီး ကျင်းပလေ့ရှိပါတယ်။
ဒီနှစ်အတွက်ဆောင်ပုဒ်ဟာ Climate Action for peace လို့ဆိုတဲ့ ရာသီဥတုအတွက် လှုပ်ရှားရင်း ငြိမ်းချမ်းရေးဆီသို့ဆိုတဲ့ ဆောင်ပုဒ်ဖြစ်တယ်လို့ သိရပါတယ်။

နိုင်ငံတကာငြိမ်းချမ်းရေးနေ့ အခမ်းအနားကို ရန်ကုန်မြို့မှာလည်း ဒီနေ့ကျင်းပခဲ့ပါတယ်။

ရန်ကုန်မြို့မှာ ကျင်းပတဲ့ အခမ်းအနားမှာ ဘာသာပေါင်းစုံ ဆုတောင်းပွဲအပါအ၀င် ငြိမ်းချမ်းရေး ကဗျာရွတ်ဆိုတာတွေနဲ့ ငြိမ်းချမ်းရေးအတွက် ဂုဏ်ပြုဖျော်ဖြေရေးအစီအစဉ်တွေလည်း ပါဝင်ပါတယ်။

Credit - RFA