မန္တလေး ဝန်ကြီးချုပ်အား ဂုဏ်သိက္ခာ ကျဆင်းရန် ပြုလုပ်မှုဖြင့် ဖေ့စ်ဘုတ် သုံးသူ ၂ ဦးကို အမှုဖွင့်

လူမှုကွန်ရက် ဖေ့စ်ဘုတ် စာမျက်နှာတွင် ဂရုတခုဖွဲ့ကာ မန္တလေးတိုင်း ဒေသကြီး ဝန်ကြီးချုပ် ဒေါက်တာ ဇော်မြင့်မောင် ၏ ဓာတ်ပုံများကို အသုံးပြု၍ ဂုဏ်သိက္ခာကျဆင်းစေရန် ရေးသားပို့စ် တင်ခဲ့သူ အကောင့်ပိုင်ရှင် ၂ ဦးကို ဆက်သွယ် ရေး ဥပဒေ ပုဒ်မ ၆၆(ဃ)ဖြင့် စက်တင်ဘာ ၁၆ ရက်နေ့က စတင် အမှုဖွင့်ထားကြောင်း သိရသည်။

အမှုဖွင့်ခံရသူမှာ Aung pyae San Win နှင့် Swan Ka Bar အမည်ဖြင့် ဖေ့စ်ဘုတ်အကောင့် အသုံးပြုသူ ၂ ဦး ဖြစ်ပြီး မန္တလေးခရိုင် ချမ်းမြသာစည် မြို့နယ် အမှတ်(၁၁) နယ်မြေ ရဲစခန်းတွင် အမှုဖွင့် စုံစမ်းစစ်ဆေးနေကြောင်း သိရသည်။

ထို ၂ ဦးသည် ဖေ့စ်ဘုတ်စာမျက်နှာတွင် We Love Dauk Zaw ဟူသည့် အမည်ဖြင့် ဂရုတခုဖွဲ့ကာ ပြည်သူများ အထင် အမြင် လွဲမှားစေရန် လွန်ကျူးစွာ ရေးသားသည်ဟုဆိုကာ အမျိုးသား ဒီမိုကရေစီ အဖွဲ့ချုပ်(NLD) ပါတီ မန္တလေးတိုင်း ဒေသကြီး ပြန်ကြားရေး ကော်မတီ အဖွဲ့ဝင် ဦးပုညဆွေက အမှုဖွင့်လှစ်ခဲ့ခြင်း ဖြစ်သည်ဟု ဆိုသည်။

“ပါတီရဲ့တာဝန်ပေးချက်အရ ဝန်ကြီးချုပ် ဒေါက်တာ ဇော်မြင့်မောင်ရဲ့ ကိုယ်စား တရားလိုလုပ်ပြီး အမှုဖွင့်တာပါ၊ ဝန်ကြီး ချုပ် ရဲ့ဂုဏ်သိက္ခာ ညှိုးနွမ်းစေရန်၊ ပြည်သူလူထု အထင်အမြင် လွဲမှားစေရန် လွန်လွန်ကျူးကျူး ရေးသားသူ တွေကို တရားစွဲခြင်းဖြစ်တယ်”ဟု အမှုဖွင့်ခဲ့သူ ဦးပုညဆွေက မီဒီယာများအား ဖြေကြားသည်။

ထို ၂ ဦးသည် ဒေါက်တာဇော်မြင့်မောင် ၏ ဓာတ်ပုံများကို အသုံးပြုကာ “ပါးချခံရမယ်” ၊ “ငယ်သေးတဲ့ အချစ်မို့ မလေး စား တာလား ပြောပါ ကျနော် သိပ်ချစ်တတ်တာ ကျနော်သာအသိပါ” စသည့် စာသားများ ရေးသားခဲ့သဖြင့် အမှုဖွင့် ရခြင်း ဖြစ်ကြောင်း သိရသည်။

ဝန်ကြီးချုပ် ဒေါက်တာ ဇော်မြင့်မောင်က ယနေ့ ပြုလုပ်သည့် တိုင်းဒေသကြီး လွှတ်တော် အစည်းအဝေး အပြီးတွင် “ပွင့်ပွင့်လင်းလင်းလည်း ပြောရရင် ကျနော် တခု မှလည်း မဖတ်ဘူး၊ ဒီဂရုကို စိတ်လည်း မဝင်စားဘူး၊ ဝင်လည်း မကြည့်ဘူး၊ ဒါကlove ဆိုတဲ့ စကားလုံးကိုသုံးပြီးတော့ လုပ်ချင်ရာလုပ်လို့ မရဘူး၊ ကျနော့်မှာ လွတ်လပ်ခွင့်ဆိုတာ ရှိတယ်။ ဒီကိစ္စက ပုဂ္ဂိုလ်ရေးဖြစ်တဲ့ဟာဆိုရင် ကျနော် မဖြေဘူး၊ နိုင်ငံရေးဆို ဖြေ တယ်၊ နောက်ပြီး ဒါကသတင်း ဖြစ်သလား၊ သိချင်လို့မေးတာပါ”ဟု ပြောသည်။

We Love Dauk Zaw Facebook Group ကို စက်တင်ဘာ ၁၂ ရက်နေ့က စတင် ပြုလုပ်ခဲ့ရာ လက်ရှိအချိန်အထိ အဆိုပါ Group တွင် အဖွဲ့ဝင် ၁၂၀၀ ကျော် ရှိကြောင်း သိရသည်။

ယခု ကိစ္စနှင့် ပတ်သက်၍ အမှတ်(၁၁) နယ်မြေ ရဲစခန်းနှင့် မန္တလေးခရိုင် ရဲတပ်ဖွဲ့၊ တိုင်းရဲတပ်ဖွဲ့ ရုံးများသို့ ဆက်သွယ် မေးမြန်းသော်လည်း မည်သည့်ပြန်ကြားချက်မှ မရရှိခဲ့ပါ။

ဒေါက်တာ ဇော်မြင့်မောင်သည် မန္တလေးတိုင်း အစိုးရအဖွဲ့ ဝန်ကြီးချုပ်တဦးလည်း ဖြစ်သလို လက်ရှိ အာဏာရ NLD ပါတီ ဗဟို ၏ ဒု ဥက္ကဋ္ဌ တဦးလည်း ဖြစ်သည်။

Credit - Irrawaddy